KUKUPU BEUSI
ku
Sopyan
Hardyansyah
Pajaratan lalénglang, sanggeus hiji-dua jalma naringgalkeun. Kembang rampé
mayak dina
kuburan. Taneuh beureum masih kénéh
baseuh galian dina tungtung
paningalna. Lebah keuyeumbeu ci socana…
sakolébat mangsa katukang nganjangan deui, lir film nu diputer. Langit pajaratan simpé,
mentrang srangéngé beuki mentring.
Dina
lebah keuyeumbeu ci socana… ébréh budak
peupeureudeuyan, geusan indungna mulaskeun nu haseum kana létah budakna.
“Ari ieu naon?” Tanya indungna halon.
Létah budak kadangu cuplak-céplak,- nebak-nebak wanda
naon nu bieu di ulaskeun kana létahna. Sora sakabéh simpé, nu teu simpé ngan
céplak budak.
“Asem…,” ceuk
budak bari
gégétrét; sedengkeun indungna nga-emh hungkul dina jawabna.
Singket.
“Ari nu ieu…”
“Pih! Asin!” ceuk
budak bari
ciciduh.
Mata budak masih kénéh di tutup ku lalambaran
kaén hideung, mana aya kanu
tilu sénti mah kandelna. Leungeunna (budak) rumpa-rampa, siga teu apal
kana ngaran wanda
sakurilingna; padahal budak geus umur
tujuh belas taun. Keur meneran
kitu, indungna nyokot hiji wanda, tuluy di singhareupkeun padeukeut jeung leungeun budak nu keur rumpa-rampa.
“Ari ieu naon…,” sora indungna
deui. Budak ngocéak, geusan ngarampa hiji wanda.
Panas… han
sakitu nu karasa, laju kitu, budak
ceurik nginghak - ngamuk – sagala di babétkeun; sedengkeun matana tetep katutup
ku kaén hideung
lilipetan. Budak tuluy di deuheup
masing enyana. Kaén laju di buka sakedik-kedik.
Geusan dibuka kabéh… budak
tuluy tanggah kaluhur, balas siga nu bébéja. Béh katinggal kunu
jadi anakna, cai wening
ting calangkrung dina lolopak mata indungna.
“Deudeuh teuing anak ema…”
cenah sorana kakuping beurat dareuda. Celepot pipi budak diciuman.
“Ulah ambek
ujang nyah… bisi jaga manggih
ka poék… tah ti ayeuna,
meungpeung ema aya… ujang geus
di wanohkeun kana poék, sanaos poék jijieunan,
sing jadi conto nyah… ulah sagawayah
jangji lumat-lamot, komo daék ngarampa
wanda nu can puguh piuntungeunana, sacan hidep mikir mulak-malikkeun
pikir… najan sangsara kokoro nyoso, ceuk nu dipikaasih ku ujang
ieu naon… ulah! Ulah sakali-kali
cunduk patuh tur wawanian ngajawab,
mun ujang tacan wawuh bener,
bisi ku bisi
ujang… ema rék tatan-tatan ti ayeuna, omaaat
sing inget nyah ulah poho!” cenah,
bari celengok
deui budak di cium.
Manéhna,
saurang pangacara, dina hareupeun
kuburan kiwari nginghak, lambeyna ngageter tur saeusining
dada nu karaosna kataker gegeduran. Cahya srangéngé beuki
nyérabkeun. Sirahna karasa
lungleng. Gedebut manéhna
labuh nangkuban.
“Hampurrra ma… uing téh pohooo…”
cenah, ceuk sorana halon tur
laun manan ti sora angin.
Sae pisan MasBro, tapi ieu Blog teu aya widget do-follow, janten sesah bade follow na langsung teh.
BalasHapus